பிரான்சில் மாணவர் போராட்டம்: 3,000 மாற்று ஆசிரியர்களை நியமிக்க அரசு உறுதி

சிறந்த கல்வி வசதிகளை ஏற்படுத்துதல், ஆசிரியர் பற்றாக்குறையை நீக்குதல் மற்றும் காவல்துறையின் பலப்பிரயோகத்தைக் கட்டுப்படுத்துதல் உள்ளிட்ட கோரிக்கைகளை முன்வைத்து பிரான்ஸ் முழுவதும் பல்லாயிரக்கணக்கான மாணவர்கள் போராட்டத்தில் ஈடுபட்டதைத் தொடர்ந்து, மிகவும் பாதிக்கப்பட்ட உயர்நிலைப் பள்ளிகளுக்கு 3,000 மாற்று ஆசிரியர்களை நியமிக்கக் கல்வி அமைச்சர் உறுதியளித்துள்ளார்.

ஒரு வாரத்துக்கும் மேலாக நூற்றுக்கணக்கான உயர்நிலைப் பள்ளிகளின் நுழைவாயில்களை மாணவர்கள் மறித்து போராட்டத்தில் ஈடுபட்டு வருகின்றனர். இதனால் பல பகுதிகளில் கலவரத் தடுப்புப் பொலிஸார் குவிக்கப்பட்டுள்ளதுடன், சில இடங்களில் வன்முறை மோதல்களும் இடம்பெற்றுள்ளன.

நாடு முழுவதிலும் உள்ள உயர்நிலைப் பள்ளி மாணவர்கள், ஆசிரியர்கள் உரிய முறையில் பணிக்கு வராமை, நெரிசலான பாட அட்டவணைகள், சிதிலமடைந்த வகுப்பறைகள் மற்றும் அதிகரிக்கும் வெப்பத்தைத் தாங்க முடியாத பள்ளிக் கட்டிடங்கள் உள்ளிட்ட பிரச்சினைகளை முன்வைத்துள்ளனர்.

போராட்டங்களால் ஏற்பட்டுள்ள பதற்றத்தைத் தணிக்கும் முயற்சியாக, கல்வி அமைச்சர் எட்வார்ட் ஜெஃப்ரே தொலைக்காட்சி உரையொன்றில் இந்த அறிவிப்பை வெளியிட்டுள்ளார். பிரான்சில் உள்ள சுமார் 3,700 உயர்நிலைப் பள்ளிகளில், மிகவும் மோசமாகப் பாதிக்கப்பட்ட 114 பள்ளிகளுக்கு வரும் நாட்களில் மாற்று ஆசிரியர்கள் நியமிக்கப்படுவார்கள் என அவர் தெரிவித்துள்ளார்.

போராட்டங்களில் நாடு முழுவதும் சுமார் 71,500 பேர் பங்கேற்றதாகவும், அவர்களில் பெரும்பாலானோர் தத்தமது பள்ளிகளுக்கு வெளியே திரண்டதாகவும் உள்துறை அமைச்சகம் தெரிவித்துள்ளது. மேலும், 500க்கும் மேற்பட்டோர் பொலிஸாரால் கைது செய்யப்பட்டுள்ளனர்.

தலைநகர் பாரிஸில் சுமார் 24,500 பேர் போராட்டத்தில் பங்கேற்றுள்ளனர். பாஸ்டில் சதுக்கத்தில் பள்ளி மற்றும் பல்கலைக்கழக மாணவர்கள் நடத்திய பேரணியின்போது, சிலர் வானவேடிக்கைகளை வெடிக்கச் செய்ததுடன், அங்கிருந்த நினைவுச்சின்னத்தின் மீது ஏறியும் போராட்டத்தில் ஈடுபட்டனர். சில மாணவர்கள் பிரான்ஸ் தேசியக் கொடியை அசைத்தவாறு தேசிய கீதத்தையும் பாடினர்.

பாரிஸிலுள்ள முன்னணி உயர்நிலைப் பள்ளியொன்றில் கல்வி பயிலும் 15 வயதான ஜீன், தலைநகருக்கு வெளியே உள்ள பின்தங்கிய பகுதிகளில் கல்வி பயிலும் மாணவர்களுக்கு ஆதரவு தெரிவிப்பதற்காகப் போராட்டத்தில் கலந்துகொண்டதாகக் கூறினார்.

நாம் அனைவரும் பொதுக் கல்வி முறையில் இருக்கும்போது, மற்றவர்களை விட அதிகக் கல்வி பெற்றவர்கள் என்று யாரும் இருக்கக்கூடாது என அவர் தெரிவித்தார்.

இதற்கிடையில், அண்மைய போராட்டங்களின்போது காவல்துறையினர் மேற்கொண்டதாகக் கூறப்படும் அதிகப்படியான பலப்பிரயோகத்துக்கு எதிர்ப்புத் தெரிவிப்பதற்காகப் பேரணியில் பங்கேற்றதாக 20 வயதான பல்கலைக்கழக மாணவி மரியான் குறிப்பிட்டார்.

என்னைப் பொறுத்தவரை, அது ஏற்றுக்கொள்ள முடியாதது என அவர் தெரிவித்தார்.

கல்வி வசதிகளில் நிலவும் சமத்துவமின்மை, ஆசிரியர் பற்றாக்குறை மற்றும் போராட்டங்களைக் கையாளும் காவல்துறையின் அணுகுமுறை ஆகியவை பிரான்சில் மாணவர்களின் அதிருப்திக்கான முக்கிய காரணங்களாக முன்வைக்கப்பட்டுள்ளன.